नाट्यदर्शन .

नाट्यदर्शन - संगीत ‘ कुलवधू ’

बुधवार दि. ४ मार्च २००९ रोजी सोबतीच्या साप्ताहिक सभेमध्ये ‘संगीत कुलवधू’ या नाटकावर आधारित कार्यक्रम झाला. श्री. मो.ग. रांगणेकर लिखित या नाटकाची मूळ संकल्पना कायम ठेवून केवळ दीड तासात बसेल अशी कार्यक्रम-सहिता तयार करणे, नाटकाचे कथानक आणि संगीत प्रेक्षकांपर्यंत पोहोचविणे हे खरे तर आव्हानच होते. परंतु सोबतीचे एक ज्येष्ठ, व्यासंगी व कलाप्रेमी सभासद श्री. प्र.सी. साठे यानी त्या दृष्टिकोनातून नाटकाची पुनर्मांडणी करून श्रोत्यांची वाहवा मिळविली.

सोबतीचे सभासद श्रीमती विद्या पेठे आणि श्री. अरविंद वाकणकर यानी संगीताची बाजू उत्तम रीतीने संभाळलीच पण त्याचबरोबर आवश्यक तेथे अभिनय व संवादकौशल्यही दाखविले. पार्वतीची भूमिका सौ. स्नेहल वैशंपायन यानी नेटकेपणाने वठविली.

कथानकाला आवश्यक तेवढीच पात्रे घेतल्यामुळे निवेदनातून कथानक उलगडून दाखविणे खरोखरच अवघड होते. परंतु सोबतीच्या एक ज्येष्ठ व यशस्वी कलाकार सभासद श्रीमती सुनंदा गोखले यानी आपल्या सुस्पष्ट व लयबद्ध निवेदनशैलीतून नाट्यकथानक समर्पकपणे प्रेक्षकांपर्यंत पोहोचविले.

सोबतीच्या रसिक सभासदांची या नाट्यदर्शनाला उत्स्फूर्त दाद मिळाली.