वसंतऋतूची चाहूल

मी सध्या अमेरिकेत सान फ्रान्सिस्को जवळ आहे. येथे थंडी असली तरी बर्फ पडत नाही. उलट हा हिंवाळी पावसाचा प्रदेश आहे, त्यामुळे थंडीच्या तीन-चार महिन्यांत वरचेवर पाऊस पडतो. क्वचित गाराहि पडतात.
आता हिंवाळा संपत आला आहे व वसंताची चाहूल जाणवते आहे. दोन महिन्यांपूर्वी येथे आलो तेव्हां बहुतेक सर्व झाडांची पाने पूर्णपणे गळून नुसते काठ्यांचे सांगाडे दिसत होते. लोकांनी स्वत:च्या गुलाब व इतर फुलझाडांची छाटणीहि केलेली होती. गेल्या २-३ आठवड्यांपासून उन असेल तेव्हा पायी फिरायला गेले असतां सर्वत्र बदल जाणवू लागला आहे. झोपीं गेलेली झाडे थंडीची दुलई दूर सारून वसंताचे स्वागत करताहेत. छाटलेल्या गुलाबांना नवीन पालवी, कोठेकोठे कळेहि फुटले आहेत. नवीन कोवळी पालवी सर्वत्र दिसते. फुलें घरोघरीं डोकावताहेत. हे बदलणारे निसर्गसौंदर्य भुलवणारे आहे. काल फिरायला गेलो असतां जवळ कॅमेरा होता. भराभर फोटो काढले ते तुम्हाला पहायला ठेवतो आहे.