सोबती, विलेपार्ले पूर्व, मुंबई - एक ज्येष्ठ नागरिक संघटना

सोबतीचे एक ज्येष्ठ सभासद व सिद्धहस्त कवी
श्री. नारायण जुवेकर यांची एक भावपूर्ण कविता.

जीवनसंध्या
उष्म झळा मावळता - तगमगही थांबली
थंड झुळुक घेउन ये - सांज चोरपावली
चढण उभी संपताच - भव्य लागले पठार
वृक्षाना स्पर्श करीत - साथ देई बघ समीर
संकटांशी झुंज देत - कर्तव्ये केली पार
सामाजिक दृष्टि दिली - ‍ ज्ञान देत लेकरांस
स्वार्थाचे जीवनात - करुनिया उच्चाटन
त्यातुन मग दोघांनी - जपले हे साधेपण
मोत्यासम शब्दमणी - पांचूसम आठवणी
गुंफियले हार किती - जन्मभरी दोघानी
संपले आता पठार ! - दीर्घ लागला उतार
दोघानी हात धरुनी - सहज करु हाही पार
हात ढिले होतील का - व्यर्थ असे भीति मनीं
आधारही दोघाना - होतील या आठवणी

कवी : नारायण जुवेकर